Ичкидихъ дуст хьайи инсан‚
Вал ихтибар гъиз амукьич.
Сифтедай вун тиртIа хъсан,
Эхирдай гьич чиз амукьич.
Инсанвилин туш ам къилих‚
Алахъмир вун ийиз чуьнуьх.
Ичкид иштягь хьайила къаних,
Чинизни регъуьз амукьич.
Чинизни регъуьз амукьич.
Акурла ви хизандин гьал,
ГъвечIи-чIехи хъуьрезва вал.
Беден зурзаз, мез хьана лал,
Гъил-гъили чуьхуьз амукьич.
И дуьньяда шумудни сад, -
Ажуз хьана, жемир вун шад.
Эхир кьиляй ваз хъвадай яд.
Ви веледди гъиз амукьич.
Эхь, ички я ахьтин зегьер, МуьтIуьгъардай кIани тегьер.
Гьич садазни лугьуз тежер,
Я рикIин сир хуьз амукьич.
Квадарзавай акьул кьиляй,
Ша, акъуд жув ичкид гъиляй.
Халкьарин аватна виляй,
Я садни вахъ дуьз амукьич.
1972-йис.
